eshtunamagjike

Leksione nga folësit më të mëdhenj të shekullit

2007-08-29T07:42:08+02:00

Ish-kryeministri britanik Stanley Baldëin e urrente artin e të folurit në publik dhe ia vinte fuqisë së tij fajin për gjakun e derdhur përgjatë historisë. Ai besonte se "rrëfimi i së vërtetës nuk kishte nevojë për art". Por folësit më të mëdhenj të historisë kanë dëshmuar se e vërteta është krejt ndryshe. Ata kanë dëshmuar se nuk mjafton që një folës i sprovuar t'i thotë të vërtetën audiencës, ajo duhet të dojë të dëgjojë të vërtetën në radhë të parë.
Thënë thjesht, fjalimet e mëdha vijnë nga zërat pasionantë dhe autoritarë të së vërtetës. Për të arritur autoritetin, folësit legjendarë kanë përdorur një gamë të gjerë të veçorive retorike dhe oratorike. Disa prej këtyre tipareve janë të përveçme dhe lindin bashkë me njeriun, disa të tjerë janë të disponueshme për çdo folës publik që mund t'i përdorë ato siç duhet, pavarësisht nëse bëhet fjalë për një prezantim modest apo për një angazhim më të madh profesional. Disa prej liderëve më të mëdhenj botërore kanë qenë gjithashtu oratorët më të mëdhenj të botës. Ish-kryeministri britanik Winston Churchill na mëson se pika kyçe në një fjalim është pozicionimi i qëllimeve të folësit në një kontekst më të gjerë se zakonisht. Ndërsa ish-presidenti amerikan, Ronald Reagan i cilësuar si "Komunikuesi i Madh". Ai u mëson të gjithë atyre që aspirojnë të marrin përsipër funksione lidershipi leksionin se si të jenë të dashur, por të dimë të ruajmë autoritetin që i duhet një lideri. Lideri revolucionar, Marthin Luther King dinte të fitonte zemrën e publikut në çdo rast duke përdorur fjalët më të thjeshta në një kontekst hyjnor e në çdo rast duke theksuar traditën. Ish-presidenti amerikan Franklin Roosevelt përdorte në fjalimet e tij strukturimin e frazës në mënyrë strategjike, ndërkohë që një ish-president tjetër amerikan shumë i dashur për publikun, John F. Kennedy luante me imazhin e tij. Edhe nëse fjalimet e tij mbahen mend më shumë për përmbajtjen ai kishte një paraqitje të jashtme që stimulonte simpatinë e njerëzve. Edhe pse një prej emrave që ngjall më shumë tmerr në shekullin e 20-të aftësitë oratorike të Hitlerit s'mund të mohohen asnjëherë. Aftësia e tij për të kombinuar pasionin me autoritetin kanë bërë që turma me miliona njerëz të ndjekin nga pas pushtetin dhe ideologjinë e tij.

John F. Kennedy
" … le të ecim përpara dhe të udhëheqim vendin që duam, duke kërkuar bekimin e Tij, ndihmën e Tij, por duke ditur që këtu në Tokë, puna e Zotit duhet të jetë realisht e jona".
Kennedy ishte një folës i mirë në publik, por fjalimet e tij mbahen mend më shumë për përmbajtjen e tyre. Në vitin 1960 ai debatoi me Richard Nixon, debati i parë presidencial i transmetuar në televizion. Nëse fjalimi dëgjohej në radio krijohej ideja se Nixon kishte fituar. Por po të shihej në televizor dukej sikur ishte Kennedy ai që kishte fituar, për shkak të rëndësisë që ai i jepte paraqitjes dhe qëndrimit.

Winston Churchill
"Le të shtrëngojmë fort detyrimet tona, dhe të vazhdojmë të qëndrojmë të tillë, në mënyrë që nëse Perandoria Britanike zgjat për një mijë vjet të tjerët të thonë në çdo moment, "Kjo ishte periudha më e mirë e tyre".
Si kryeministër i Anglisë gjatë Luftës së Dytë Botërore, Churchill i mbante fjalimet e tij më elektrizuese nëpërmjet radios. Taktika e tij e preferuar, të cilën e përdorte vazhdimisht ishte apeli që bënte duke përdorur historinë. Ai kalonte javë të tëra duke u dhënë atyre formë nëpërmjet saktësisë retorike, e cila virtualisht është zhdukur në ditët e sotme.

Martin Luther King, Jr.
" … ne nuk jemi të kënaqur, dhe nuk do të jemi të kënaqur derisa drejtësia të fillojë të lëvizë ujërat dhe drejtësinë në rrjedhën e tyre të duhur".
Nëse fliste në një katedër apo në një podium, Martin Luther King gjithnjë predikonte dhe hipnotizonte, duke injektuar fjalët më të zakonshme me një origjinë spirituale. Gjithashtu ai përdorte aluzione lehtësisht të njohura duke bashkangjitur idetë e tija të reja e radikale me ato të vjetrat e të stabilizuarat duke u dhënë kështu atyre prestigj e autoritet të pamohueshëm.

Adolf Hitler
Tmerri që shoqëron emrin dhe ideologjitë e Hitlerit nuk e pengon atë të jetë një mjeshtër i lindur në oratori. Asgjë nuk ka kontribuar më shumë në lavdinë e tij sesa aftësitë e tij oratorike. Fjalët që nxirrte nga goja gjatë fjalimeve ngjanin më shumë sa kallëpe dinamiti, ato bindin miliona vetë të ecnin pas tij dhe kauzës së tij. Si rezultat, ai konsiderohet si shumë studiues si një prej folësve më të mëdhenj në publik të shekullit të 20-të. Është pikërisht përzierja e pasionit me autoritetin ajo që e bënte Hitlerin të ndizte turmën.

Ronald Reagan
"Ne nuk do t'i harrojmë kurrë atë e as herën e fundit, të cilën i pamë ata, këtë mëngjes, ndërsa ata përgatiteshin për udhëtim, ndërsa përshëndetën me dorë dhe "rrëshqitën përtej kufirit të zymtë të tokës" për "të prekur fytyrën e Zotit"
Reagan fitoi epitetin "Komunikues i Madh" për shkak të efikasitetit çarmatosës të tonit të zërit. Ai i tërhiqte dëgjuesit dhe u fitonte zemrat me stilin e tij personal dhe të ngrohtë që ngjante bisedor e atësor, informal por autoritar dhe gjithmonë vigjilent ndaj qëllimeve të tij.

Franklin D. Roosevelt
"… Amerika u sulmua papritur dhe me qëllim nga forcat e Perandorisë së Japonisë... Shtetet e Bashkuara ishin në paqe... forcat japoneze sulmuan Hong Kongun, forcat japoneze sulmuan Guamin, forcat japoneze sulmuan ishujt Filipine..."
12 vitet e Roosevelt-it në detyrë si President i SHBA përkuan me disa prej kohëve më të trazuara të vendit, duke i dhënë atij më së shumë se një rast për të mbajtur një fjalim të madh. Në rastin e "Pearl Harbour" ai e portretizon Japoninë si një agresor i paprecedent duke vënë në punë formën pasive dhe aktive të foljeve.

Comments

Të famshëm e të pasur, por pa një diplomë në xhep

2007-08-29T07:41:29+02:00

Ata janë miliarderë dhe idhuj të miliarda njerëzve nëpër botë. Por ç’kanë bërë për të merituar gjithë këtë? Janë femra e meshkujt të bukur, kanë aftësi në aktrim, kanë zë për të kënduar. Vetëm për të studiuar s’kanë qenë të aftë. Pjesa më e madhe e yjeve të Hollivudit mund të quhen shumë mirë “të pashkollë” pasi një pjesë e madhe e tyre i ka braktisur studimet që në shkollë të mesme.
Brezi i ri i artisteve siç janë Britney Spears, Jessica Simpson, Avril Lavigne etj, kanë vendosur t’i përkushtohen karrierës muzikore në vend që të ndjekin shkollën e mesme. Një brez tjetër para atyre ka denjuar të regjistrohet në universitet, por pa e mbaruar kurrë. Brad Pitt, Julia Roberts, Sandra Bullock etj, edhe pse sot janë miliarderë, para shumë vitesh kanë vendosur të ndërpresin studimet universitare.
Të famshëm dhe pa shkollë
Në shumë profesione mungesa e një diplome përkatëse do të ishte problem. Por jeta është ndryshe në Hollivud. Nga 20 aktorët dhe aktoret më të paguara të Hollivudit, listë e revistës Forbes, pasuria totale e të cilëve arrin 529 milionë dollarë, vetëm dy kishin një diplomë Universiteti, Adam Sandler dhe Cate Blanchett. Ndërsa për VIP-at që s’janë aktorë ndryshon puna. Për skenaristët, regjisorët, prezantuesit, diploma është mëse e zakonshme. Disa prej të diplomuarve janë Oprah Winfrey, Steven Spielberg, David Letterman, etj. Sipas psikologut klinik, James Houran, diploma e Universitetit është diçka krejtësisht e panevojshme për rezymenë e të famshmëve. Ndryshe nga më parë kur yjet mbështeteshin në aftësitë dhe cilësitë e tyre për të rënë në sy, sot ekziston një mënyrë tjetër e të bërit të “yjeve”. Tashmë të jesh i famshëm nuk ka lidhje me aftësitë apo mundësitë, por ka të bëjë me promovimin dhe shitjen tek publiku.
VIP-at e pashkolluar
Ndërkohë që mungesa se një diplome nuk është ndonjë fenomen i ri në Hollivudit, emra të tillë si George Clooney, Brad Pitt, Julia Robert, etj, të paktën kanë tentuar të studiojnë për disa vite në Universitet, për ta braktisur atë në mes. Brezi i ri i yjeve të Hollivudit shfaq të dhëna të frikshme për sa i përket arsimimit të atyre që në një farë mënyrë kthehen në ikona të adoleshentëve e të rinjve kudo në botë, duke mos mbaruar as shkollën e mesme. Ato fitojnë shuma të mëdha parash pa hyrë akoma në adoleshencë pa pasur rëndësi fare se sa të zgjuar janë, ndaj dhe nuk e shohin aspak të nevojshme të shkojnë në shkollë.

Të diplomuar:

1. Oprah Winfrey

Prezantuese
Pasuria: 260 milionë dollarë
Universiteti i Tenesi
(Tennessee State University)
Dega: Dramë dhe Fjalim

2.Steven Spielberg

Regjisor
Pasuria: 110 milionë dollarë
Universiteti i Kalifornisë
(California State University at Long Beach)
Dega: Film dhe Arte Elektronike
Dimpluar në vitin 2001

. Shaquille O’Neal

Basketbollist
Pasuria: 32 milionë
dollarë
Universiteti i Luizianës
(Louisiana State University)
Dega: Studime të përgjithshme
Diplomuar në vitin 2000

4.Michael Jordan

Basketbollist
Pasuria: 31 milionë
dollarë
Universiteti i Karolinës së Veriut
(University of North Carolina)
Dega: Gjeografi

........

Ata që kanë lënë shkollën e mesme

1. Jessica Simpson

Këngëtare
Mosha: 26 vjeç
La shkollën e mesme “JJ Pearce High School” në vitin 1977 për të vazhduar karrierën muzikore

2. Paris Hilton

Trashëgimtare, personazh publik
Mosha: 26 vjeç
La shkollën e mesme luksoze “Dwight” në Manhatan, të cilën e kanë ndjekur mjaft nxënës që janë bërë më pas të famshëm.

3.Britney Spears

Këngëtare
Mosha: 25 vjeç
Para ngritjes dhe rënies së saj meteorike, këngëtarja e popit la shkollën e mesme “Kentwood High School” në Luiziana për të vazhduar karrierën muzikore.

4. Mischa Barton

Aktore
Mosha: 21 vjeç
Ylli i dramës për adoleshentë “The O.C” mbaroi shkollën Profesionale të Fëmijëve në Manhatan në vitin 2004, por nuk ka vazhduar shkollimin më tej.

5. Avril Lavigne

Këngëtare
Mosha: 22 vjeç
Këngëtarja e cila u shfaq në tregun muzikor që në moshën 16-vjeçare e la shkollën e mesme në Ontario, Kanada pasi siguroi një kontratë me një shtëpi diskografike.

6. Lindsay Lohan

Mosha: 20 vjeç
Flokëkuqja e Hollivudit e
la shkollën e mesme për t’iu kushtuar karrierës së aktrimit e sigurisht mbrëmjeve të shumta në shoqërinë e alkolit.

........

Ata që kanë lënë Universitetin

1. Brad Pitt

Aktor
Pasuria: 35 milionë dollarë
Dega: Gazetari, Universiteti i Misurit

2. George Clooney

Aktor
Pasuria: 25 milionë dollarë
Dega: Transmetim, Universiteti i Kentakit

3. Julia Roberts

Aktore
Pasuria: 9 milionë dollarë
Universiteti i Xhorxhias

4. Tom Hanks

Aktor
Pasuria: 74 milionë dollarë
Dega: Teatër, Universiteti i Kalifornisë
California State University in Sacramento

5. Madonna

Këngëtare
Pasuria: 72 milionë dollarë
Dega: Kërcim modern, Universiteti i Miçiganit

6. Sandra Bullock

Aktore
Pasuria: 10 milionë dollarë
Dega: Dramë, Universiteti i Kalifornisë Lindore

Comments

Shtatë mrekullitë e botës nënujore

2007-08-29T07:40:06+02:00

Lista e mrekullive të botës nënujore e ka origjinën të panjohur, por ajo është përsëritur mjaftueshëm për të fituar një shkallë rëndësie. Njëri prej tyre është ishulli Palau, zyrtarisht republika e Palaut. Ky ishull ndodhet në Oqeanin Paqësor, rreth 800 kilometra në lindje të Filipineve. Mrekullia e dytë është janë shkëmbinjtë nënujorë në Belize. Guma e koraleve në Belize është strehë e një numri të madh bimësh dhe kafshës, një prej ekosistemeve më të larmishme në botë.
Aty gjendjen 70 specie të forta koralesh, 36 specie të buta koralesh, 500 specie peshqish, me qindra specie jorruazorësh. 90 për qind e shkëmbinjve nënujorë duhet zbuluar. Vetëm 10 për qind e specieve janë bërë të njohura. Të listuara në vend të katërt qëndrojnë grykat hidrotermale. Këto janë të çara në sipërfaqen e tokës nga të cilat del ujë i nxehtë nga thellësia me përmbajtje të lartë mineralesh. Zonat pranë grykave hidrotermale janë biologjikisht prodhuese. Gryka hidrotermale aktive besohet të ekzistojnë në hënën e Jupiterit, Europa, dhe të çara të tilla të larta mendohet se kanë ekzistuar në Mars. Një tjetër mrekulli e mbrojtur nga UNESCO janë edhe ishujt “Galapagos”. Emri i vjen nga bashkimi i “guackave” dhe “breshkave”. Këto janë një arkipelag i ishujve vullkanikë të shpërndarë përqark ekuadorit, 965 kilometra në perëndim të Ekuadorit kontinental në oqeanin Paqësor. Vendin e gjashtë e mban liqeni Baikal, një prej liqenjve më të mëdhenj në botë. Liqeni Baikal shtrihet në Siberinë jugore në Rusi, mes Irkutsk Oblast në veriperëndim dhe Buryatia-s në juglindje, pranë qytetit Irkutsk. Deti i Kuq është një prej ujërave më të kripur në botë, për shkak të efekteve të qarkullimit të ujit që rezulton nga avullimi dhe tensioni i erës. Kripësia varion nga 3.6 deri në 3.8 për qind.

Ishulli “Palau”

Zyrtarisht “Republika e Palaut”, është një ishull-komb prej 177 miljesh katror në oqeanin Paqësor, rreth 800 kilometra në lindje të Filipineve dhe 3200 kilometra në jug të Tokios. Duke qenë se ka dalë nga kujdestaria e OKB-së (administruar nga SHBA) në vitin 1994, është një prej kombeve më të reja dhe më të vogla të botës. Ishujt më të populluar janë Angaur, Babeldaob, Koror dhe Peleliu.

Guma e koraleve në Belize

Gumat nënujore “Belize” janë një seri koralesh që përvijojnë gjirin e Belizës, rreth 300 metra larg bregut dhe 40 kilometra në jug. Këto mrekulli të natyrës të mbrojtura nga UNESCO shtrihen rreth 300 kilometra, duke qenë sistemi i dytë për nga madhësia i koraleve në botë, pas atij në Australi. Ky vend është destinacioni më i frekuentuar në Belize, me gati 260 mijë vizitorë.

Guma e madhe nënujore, Australi

Guma e madhe nënujore në Australi është sistemi më i madh i koraleve në botë, i përbërë prej 3 mijë shkëmbinj individualë dhe 900 ishuj që shtrihen për 2600 kilometra mbi një zonë prej 344,400 kilometrash katrorë. Guma ndodhet në detin Koral, të ndarë nga gjiri “Queensland” në Australi. Ajo dallohet edhe nga hapësira dhe është struktura e vetme në botë që përbëhet nga organizma të gjallë.

Grykat hidrotermale

Një grykë hidrotermale quhet një “oxhak i zi”, një plasje në sipërfaqen e planetit nga e cila del ujë i nxehtë i ngrohur nëntokë. Grykë hidrotermale gjenden rëndom pranë vendeve me aktivitet vullkanik, pllakëzave tektonike të ndara, gjire oqeanike dhe vendeve të nxehta. Të tilla ka plot në botë, më i famshmi është Parku Kombëtar “Yellowstone” në SHBA.

Ishujt “Galapagos”

Arkipelagu “Galapagos”, me një popullsi prej 30 mijë banorësh, është provincë e Ekuadorit, një shtet në veri-perëndim të Amerikës së Jugut. Ishujt janë të gjitha pjesë e sistemit të parkut kombëtar të Ekuadorit. Ato janë të famshme për numrin e madhe të specieve endemike dhe të studimeve të kryera nga Charles Darwin gjatë udhëtimeve të tij.

Liqeni Baikal

Njihet gjithashtu si “Syri i kaltër” i Siberisë. 1637 metra i thellë, me trupin 1285 metra mbi nivelin e detit, liqeni Baikal është më i thelli në botë. Është në të njëjtën kohë liqeni më i madh me ujë të freskët për nga volumi. Mban afërsisht 20 për qind të sipërfaqes me ujë të freskët të botës dhe 90 për qind të ujit të freskët të rrjedhshëm në Rusi.

Deti i Kuq

Deti i Kuq është një gji i oqeanit Indian, mes Afrikës dhe Azisë. Lidhja me oqeanin është në jug, përmes ngushticës Babe el Mandeb dhe Gjirit të Adenit. Në veri ndodhet gadishulli i Sinait dhe Gjiri i Suezit (që çon në kanalin e Suezit). Deti i Kuq ka një sipërfaqe prej 450,000 kilometrash katror, 1,900 kilometra i gjatë dhe 300 kilometra në pikën më të gjerë.

Comments

25 zbulimet më të mëdha shkencore në histori

2007-08-29T07:39:18+02:00

Cila është zbulimi dhe progresi shkencor më i madh i të gjitha kohërave? E përditshmja amerikane “Usa Today” propozon 25 prej tyre, të cilat rastësisht kanë ndodhur në 25 vitet e fundit. Seleksionimi është arbitrar, i kryer nga një grup ekspertësh. Shkencëtarë të ndryshëm kanë mendime të ndryshme, megjithatë, këto mbeten zbulimet dhe arritjet që kanë modeluar teoritë moderne dhe kanë hapur rrugë të reja për mjekësinë dhe shkencën.
1. Universi zgjerohet me shpejtësi gjithnjë e më të madhe (1998)
Galaktikat largohet gjithnjë e më shpejt nga njëra-tjetra. Në të njëjtën kohë edhe universi zgjerohet në mënyrë përshpejtuese, ndryshe nga ajo që besohej më parë. Kjo shpikje i mahnit shkencëtarët, të cilët ende kërkojnë një shpjegim.
2. Genomi njerëzor (2000)
Dy konkurse të shkencëtarëve të famshëm, një i publikuar dhe një privat, deklarojnë se kanë hartuar një genom njerëzor. Hapet një epokë e re për kërkimet mjekësore dhe biologjike.
3. Marrëveshja për klimën (2001-2007)
Paneli Ndërqeveritar për Klimën modifikon pozicionin e çdo vendi në lidhje me ngrohjen globale, i cili nga “shumë i mundshëm” bëhet “i pakontrollueshëm”.
4. “Hubble” (1990)
Del në treg “Hubble”, teleskopi i parë hapësinor, i destinuar për t’u kthyer në “syrin” më produktiv në univers dhe një simbol i progresit shkencor.
5. Gjurma e Big Bengut (1992)
Sonda e “NASA Cosmic Background Explorer (COBE)” gjen gjurmët e lëna nga radioaktiviteti kozmik prej të cilit janë lindur galaktikat.
6. ADN “e ligjshme” (1985)
Sër Alec Jeffreys, i Universitetit “Leicester”, në Angli, njofton një metodë për identifikimin e personave në bazë të ADN-së, një metodë që më vonë kthehet në një prej instrumenteve kryesore të mjekësisë së ligjshme dhe një ndihmë e jashtëzakonshme për hetimet e policisë.
7. Delja e parë e klonuar, Dolly (1996)
Ian Wilmut, nga instituti “Roslin” në Skoci, njofton lindjen e Dolly-it, delja e parë e klonuar. Dolly shumë shpejt do të ndiqet nga klone të shumë kafshëve të tjera.
8. Interneti, “WORLDWIDE WEB” (1989)
Fizikani Tim Berners-Lee, në “CERN” të Gjenevës, krijon një metodë për të lidhur faqet përmes internetit, qëllimi i së cilës është të transmetojë të dhënat e kërkimeve. Ky ishte një zhvillim i rëndësishëm për përparimin e rrjetit informativ.
9. Vrima e ozonit (1987)
Shkencëtarët e NASA-s zbulojnë që në Antarktidë po shkrihet ozoni i stratosferës, një pengesë mbrojtëse e rëndësishme ndaj rrezeve ultravjollcë.
10. Planetë jashtëdiellorë (1995)
Astronomët zviceranë, Michel Mayor dhe Didier Queloz, zbulojnë një planet orbita e të cilit ndodhet brenda yllit 51 Pegasi B, e ngjashme me diellin. Që nga ajo ditë janë identifikuar rreth 200 planetë jashtë sistemit diellor, mes të cilëve njëri konsiderohet “i banueshëm”.
11. Interferenca me “RNA”-në (1998)
Biologët Andrew Fire dhe Craig Mello zbulojnë se si “Rna”-ja mund të interferojë në mënyrë selektive me gjenet. Një zbulim që mund të ketë zhvillime të jashtëzakonshme në fushën mjekësore.
12. Top Quark (1995)
Shkencëtarë nga “Fermilab”, në Shtetet e Bashkuara, zbulojnë “top quark”, një pjesëz nën-atomike e cila kërkohej prej kohësh. Konfirmimi për ekzistencën e saj siguron baza solide për teoritë më moderne të strukturës së materies.
13. Zbulohet dinozauri primat (1992)
Kërkues kinezë dhe amerikanë zbulojnë fosilet e mbetura të një dinozauri primat. Një konfirmim për teorinë që thotë se zogjtë janë pasardhës të dinozaurëve.
14. Plutoni “ulet në pozitë” (2006)
Bashkimi Astronomik Ndërkombëtar dekreton se Plutoni nuk klasifikohet më si një planet klasik, por si një planet “nano”, një kategori e re së cilës, përveç Plutonit, i përkasin dhe të gjitha trupat me një dimension të përcaktuar që rrotullohen, ashtu si Neptuni.
15. Qeliza të qëndrueshme embrionale (1997)
Një skuadër shkencëtarët i Universitetit “Wisconsin” izolon për herë të parë qeliza të qëndrueshme embrionale njerëzore. Kështu hapet një erë e re për mundësitë terapeutike, po kështu edhe për debatet bio-etike.
16. Ujë në Mars (2000-2004)
Sonda e “NASA Opportunity” gjen në Mars gjurmë të cilat në epokat e hershme duhet të kenë qenë ato të kënetave të kripura, me siguri të ngjashme me jetën.
17. Hominoidi më antik (1994)
Një fosil etiopian i mbetur prej 4,4 miliona vitesh më parë, “Ardipithecus ramidus”, zbulohet nga një skuadër i Universitetit të Kalifornisë në Berkeley, duke u kthyer në përfaqësuesin më të lashtë të njohur nga specia njerëzore.
18. Jo “krijimit” në shkolla (2005)
Gjykatësi federal, Jones ndalon një shkollë amerikane të mësojë se një mendje inteligjente ka krijuar dhe projektuar jetën.
19. Zbulohet masa e neutrinit (1998)
Kërkues japonezë dhe amerikanë tregojnë se neutrini, një pjesëz elementare me rënie të radioaktivitetit, përmban një masë, duke ofruar elementë të rinj për një teori të materies të universit.
20. Ndryshime dramatike klimatike (1982-85)
Gjeologë dhe paleoklimatologë zbulojnë se gjatë 600 milionë vitet e fundit, janë verifikuar ndryshime edhe më shumë dramatike në temperaturë, me pasoja të thella në shirat e disa zonave të planetit. Një teori tjetër thotë se modifikime të ngjashme mund të jenë provokuar nga aktivitete njerëzore.
21. Shpërtimi i neuroshkencave (1990-deri më sot)
“Dekada e trurit”, e filluar në vitet ’90, nuk ka përfunduar në vitin 2000, por vazhdon me përparime progresive në eksplorimin e sistemit nervor qendror, falë mjeteve hetuese gjithnjë e më të sofistikuara.
22. Teletransporti (1998)
Kërkuesit austriakë të universitetit të Vjenës, arritën të transferojnë në një distancë të largët një foton, e cila është një pjesëz e dritës.
23. Biologjia Evolutive e Zhvillimit “Evo Devo” (1999)
Lind një degë e re e biologjisë: “Evo-Devo”, shkurtimi i “Biologjia Evolutive e Zhvillimit”, që studion raportet mes zhvillimit embrional dhe evolucionin e specieve. Nga njëra anë, strukturat e jetës riformohen me çdo lindje të re organizmi me besnikëri të lartë, por disa mutacione kanë modifikuar këto plane të zhvillimit trupor, duke prekur thellësisht disa përparime të rëndësishme të evolucionit.
24. Mosha e epokës së astronomisë diellore (1996)
Fillon aktiviteti i “International Solar and Heliospheric Observatory (SOHO)”. Satelitët vëzhgojnë yllin tonë, duke hapur erën e sizmologjisë diellore dhe parashikimeve të kohës hapësinore.
25. Zbulimi i “Hobbit” (2004)
Një skuadër shkencëtarësh indonezianë dhe australianë i habit paleontologët, duke pohuar se kanë zbuluar mbetjet e të ashtuquajturit “Homo floresiensis”, një njeri i vogël primitiv i 18 mijë viteve më parë, me trurin e reduktuar, por i aftë të përdorë mjetet për të gjuajtur. Edhe sot, zbulimi mbetet më i diskutuari.

Comments

Ligjet më të çuditshme në të gjithë botën

2007-08-29T07:38:40+02:00

Nuk është çudi që avokatët janë ndër profesionistët më të paguar. Lexoni listën e ligjeve më të çuditshme të publikuar nga “The Daily Telegraph” dhe nuk do të habiteni më pse njerëzit mbushin sallat e gjyqeve edhe për çështjet më të parëndësishme. 1. Në Viktoria, Australi, vetëm një elektricist i licencuar mund të ndërrojë llambat.
2. Në Viktoria, Australi, është e ndaluar të veshësh pantallona ngjyrë ciklamin e ndezur pas mesditës të ditës së diel.
3. Në Angli është e jashtëligjshme që një taksi në qytetin e Londrës të transportojë qenë të tërbuar apo kufoma.
4. Në Angli është e jashtëligjshme të vdesësh në Dhomat e Parlamentit.
5. Në Angli është vepër tradhtie të ngjitësh një pullë poste të monarkëve britanikë mbrapsht.
6. Në Francë është e ndaluar t’i vësh një derri emrin Napoleon.
7. Nën Ligjin e vitit 2006, të Skemave të Shmangies së Taksave në Mbretërinë e Bashkuar, është e paligjshme të mos i thuash taksambledhësit atë që ti nuk do që ai të dijë, edhe pse nuk je i detyruar t’i thuash gjërat që s’e ke problem të tregosh.
8. Në Alabama është e paligjshme për një shofer që të lidhë sytë ndërsa nget automjetin.
9. Në Ohaio kundërshton ligjet e shtetit nëse deh një peshk.
10. Anijet e Flotës Mbretërore që hyjnë në Portin e Londrës, duhet të sjellin një fuçi me rum për Kryeoficerin e Kullës së Londrës.
11. Në Mbretërinë e Bashkuar, një grua shtatzënë mund të kryejë nevojat personale ku të dojë, madje, nëse e kërkon, edhe në helmetën e një polici.
12. Në Lancashire asnjë personi nuk i lejohet, kur i kërkohet të ndalë nga oficeri i bregdetit, të nxisë në qen të lehë.
13. Në Majami, Florida, është e jashtëligjshme të ecësh me patina në një rajon policie.
14. Në Indonezi dënimi për masturbimin është prerja e kokës.
15. Në Mbretërinë e Bashkuar të gjithë meshkujt mbi 14 vjeç duhet të bëjnë praktikë dy orë hedhje shigjete në ditë.
16. Në Londër qytetarëve u lejohet të kalojnë me tufën e deleve në Urën e Londrës pa paguar asnjë tarifë; atyre u lejohet të drejtojnë patat në rrugën Cheapside.
17. Në San Salvador, shoferët e dehur mund të dënohen me vdekje para skuadrës së qitjes.
18. Në Mbretërinë e Bashkuar, një mashkull që duhet të urinojë në publik patjetër mund ta bëjë nëse është i drejtuar nga rrota e prapme dhe e mban dorën e djathtë tek automjeti.
19. Në Florida gratë e pamartuara që parashutojnë të dielave mund të burgosen.
20. Në Kentaki është e paligjshme të mbash një armë më shumë se 30 centimetra të gjatë, të fshehur.
21. Në Çester banorët e Uellsit ndalohen të hyjnë në një qytet para lindjes dhe të qëndrojnë pas perëndimit.
22. Në qytetin e Jorkut është e ligjshme të vrasësh një skocez brenda mureve të lashta të qytetit, por vetëm nëse ai ka një hark dhe shigjetë.
23. Në Boulder, Kolorado, është e paligjshme të vrasësh një zog brenda kufijve të qytetit dhe gjithashtu të “zotërosh” një kafshë. Banorët e qytetit, nga ana ligjore, janë “kundërshtues” të kafshëve.
24. Në Vermont gratë duhet të marrin një leje të shkruar nga burrat e tyre nëse duan të vënë dhëmbë të rreme.
25. Në Londër është e paligjshme të thërrasësh taksi nëse keni sëmundje epidemike.
26. Në Bahrain një doktor mashkull mund të hetojë në mënyrë të ligjshme gjenitalet e një gruaje, por e ka të ndaluar t’i shohë drejtpërsëdrejti gjatë hetimit; ai mund të shohë vetëm reflektimin në pasqyrë.
27. Koka e çdo balene të ngordhur e gjetur në bregdetin britanik është ligjërisht pronë e Mbretit; bishti, i përket Mbretëreshës, nëse i duhen kockat për korsenë.
28. Në Eureka, Nevada, SHBA, është ende e paligjshme që burrat me mustaqe të puthin gratë.
29. Në Alexandria, Minesota, SHBA, është ende e paligjshme që një burrë, të cilit i mban frymëmarrja erë hudhrash, qepësh apo sardelesh, të kryejë marrëdhënie seksuale me gruan e tij.
30. Në kontenë Logan, Kolorado, SHBA, është ende e paligjshme të puthësh një grua nëse ajo është në gjumë.
31. Në Providence, Rhode Island, SHBA, është ende e jashtëligjshme që të zotët e dyqaneve t’i shesin kolinoz dhe furçë dhëmbësh të njëjtit klient të dielave.
32. Në Zion, Illinois, SHBA, është ende e paligjshme t’i ofrosh cigare kafshëve shtëpiake.
33. Në St. Louis, Misuri, SHBA, është ende ilegale që një zjarrfikës të shpëtojë gratë që janë ende me këmishë nate.
34. Në Ames, Ioua, SHBA, është ende e paligjshme që burrat të pinë tre gllënjka birre ndërsa janë në shtrat me bashkëshortet e tyre.
35. Në Maryland, SHBA, është ende e paligjshme që stacionet radiofonike të luajnë këngën e Randy Newman “Short people”.
36. Në Oklahoma, SHBA, është ende e paligjshme të bësh fytyra qesharake para qenit, një krim që mund të rezultojë në dënim me burg.
37. Në Teksas, SHBA, kriminelëve ende u kërkohet t’u japin viktimave të tyre të paktën 24 orë më parë, njoftim të shkruar apo oral ku shkruhen detajet e krimit që do dtë kryejnë.
38. Në Uashington, SHBA, është ende një krim të pretendosh se ke prindër të pasur.
39. Në Baltimore, Maryland, SHBA, është ende një krim të marrësh një luan në kinema.
40. Në Tremonton, Utah, SHBA, është ende një krim që një grua të ketë marrëdhënie seksuale me një burrë në ambulancë. Ajo mund të akuzohet për keqbërje dhe mund t’i botohet emri në gazetë
41. Në Oksford, Ohio, SHBA, është ende e jashtëligjshme që një grua të zhvishet para pikturës së një burri.
42. Në Majami, Florida, SHBA, është ende e paligjshme për këdo që të imitojë një kafshë.
43. Në Afganistan, milicia talebane i ndaloi gratë të vishnin çorape të bardha, në rast rreziku se mos meshkujve i dukeshin tërheqëse. Policia gjithashtu urdhëroi që dritaret të lyheshin me të zezë, në mënyrë që të mos shiheshin nga jashtë.
44. Në Shtetet e Bashkuara Amerikane, impotenca është baza e divorcit në 24 shtete.
45. Në Illinois, SHBA, është e jashtëligjshme t’i japësh një cigare të ndezur një kafshe.
46. Në Ioua, SHBA, është e jashtëligjshme të puthesh më shumë se pesë minuta.
47. Në International Falls, Minesota, SHBA, është kundër ligjit që një qen të ndjekë një mace mbi një shtyllë dhe të zotët e qenve mund të gjobiten për këtë.
48. Në Kentucky, SHBA, është e jashtëligjshme të mbash një kosh akulloreje në xhep.
49. Në Louisiana, SHBA, nëse kafshon dikë me dhëmbë, kjo klasifikohet si “sulm i thjeshtë”, por nëse e kafshon dikë me protezat e dhëmbëve, atëherë konsiderohet si “sulm i rëndë”.
50. Në Masaçusets, SHBA, është e paligjshme që personat në zi të hanë më shumë se tre sanduiçe në zgjim.
51. Në Chico, Kaliforni, SHBA, ligji thotë se kushdo që detonon një mekanizëm bërthamor brenda kufijve të qytetit do të gjobitet me 500 dollarë
52. Në Liban çdo burrë mund të kryejë marrëdhënie seksuale me çdo kafshë, për sa kohë që ajo të jetë femër.
53. Në Conorsville, Wisconsin, SHBA, është ende e paligjshme që një burrë të hapë zjarr me armë ndërsa kryen marrëdhënie seksuale me gruan e tij.
54. Në Tremonton, Utah, SHBA, është e jashtëligjshme që një grua të kryejë marrëdhënie seksuale me një mashkull, ndërsa ai është duke i dhënë ambulancës.
55. Në Oblong, Illinois, është e paligjshme të kryesh marrëdhënie seksual ndërsa jeni për peshkim apo gjueti, ditën e dasmës.
56. Në Hastings, Nebraska, SHBA, ligji thotë se të zotët e hoteleve duhet t’i sigurojnë këmisha nate të bardha vizitorëve. Asnjë çifti nuk i lejohet të ketë marrëdhënie seksuale në hotel nëse nuk i kanë veshur këto këmisha të pastra.
57. Në Willowdale, Oregon, SHBA, asnjë burrë nuk mund të thotë shajë ndërsa kryen marrëdhënie seksuale me gruan e tij.
58. Në Kingsville, Teksas, SHBA, është e jashtëligjshme që derrat të kryejnë marrëdhënie seksuale në pronën e aeroportit.
59. Në Florida është e jashtëligjshme të kryesh marrëdhënie seksuale me një ferrëgjatë.
60. Gjatë Luftës së Dytë Botërore, kushdo për të cilin zbulohej se ishte homoseksual në ushtrinë franceze, ekzekutohej.
61. Me qindra vite më parë në Japoni, kushdo që tundohej të largohej nga vendi ekzekutohej.
62. Shteti i parë që hoqi dënimin me vdekje ishte Austria, në vitin 1787.
63. Në Wetaskiwin, Alberta, Kanada, në vitin 1917, ishte e jashtëligjshme të lidhje një kalë mashkull pranë një kali femër.
64. Në San Diego, SHBA, hipnotizmi është i ndaluar në shkolla publike.
65. Të përtypësh çamçakëz është veprim i jashtëligjshëm në Singapor.
66. Në Paraguai dueli është i ligjshëm për sa kohë që të dyja palët regjistrohen si dhurues gjaku.
67. Në Milano, Itali, ekziston një ligj që kërkon nga qytetarët që të buzëqeshin gjatë gjithë kohës, përndryshe rrezikojnë një gjobë të rëndë. Përjashtimi i vetëm janë spitalet dhe funeralet.
68. Në Zvicër çdo qytetar ka të drejtë nga ligji të ketë leje të hyjë në një bunker.
69. Në Burma është e jashtëligjshme të kesh internet. Nëse një person zbulohet se posedon një modem, burgoset.
70. Në Bangladesh është e jashtëligjshme për fëmijët e shkollës që të kopjojnë në një provim. Madje dhe nxënësit më të rinj se 15 vjeç mund të burgosen për këtë.
71. Deri në vitin 1984, belgët duhet ta zgjidhnin emrin e fëmijëve nga një listë me 1500 të tillë, e mbushur që në kohët e Napoleonit.
72. Në Rumani, në vitin 1935, Mickey Mouse u ndalua nga autoritetet, pasi ato mendonin se pamja e brejtësit 3 metra të lartë do të tmerronte fëmijët e vendit.
73. Filmat e “Donald Duck” u ndaluan një herë në Finlandë, pasi ai asnjëherë nuk vishte pantallona.
74. Belgjika është shteti i vetëm që kurrë nuk ka imponuar censurë në lidhje me filmat për të rritur.
75. Filmat me karate janë ndaluar në Irak në vitin 1979.
76. Në Indiana, SHBA, gjatë viteve ’50, të gjitha filmat me Robin Hudin janë ndaluar, pasi autoritetet mendonin se të grabisësh të pasurit për t’ia dhënë të varfërve ishte akt komunizmi.

Comments

“Times”: 50 skandalet më të mëdha në botën e sportit

2007-08-29T07:37:24+02:00

Shit-blerje ndeshjesh dhe trukime rezultatesh. Substanca dopuese dhe medalje të sekuestruara pas analizave nga zyra e anti-dopingut. Sportistë të detyruar të harrojnë profesionin e tyre për shkak se kanë lindur në një vend si Afrika e Jugut, ku qeveris regjimi i Aparteidit. Skuadra që u hiqen pikë ose degdisen një kategori më poshtë, sikundër i ndodhi Juventusit të 2006-s dhe Marsejës së 1993-shit.
Atletë rekordmenë të cilët shtiren sikur kanë pësuar një aksident me motor për t’i shpëtuar testeve të dopingut. Skuadër paralitikësh që fiton titullin e kampionit, por pas verifikimeve vërehet se dhjetë nga dymbëdhjetë prej lojtarëve nuk kishin qenë veçse persona normalë. Ishte dora e Zotin dhe jo e Maradonës në çerekfinalen e botërorit “Meksikë 1986”. Kjo është pak a shumë ajo çka u dhuron lexuesve sot gazeta “Tirana Observer”, duke iu referuar revistës “Times” në një speciale me 50 skandalet më të mëdha në botën e sportit.

1) Basil D Oliveira
Sporti: Kriket
Për shkak të tij, regjimi i Aparteidit në Afrikën e Jugut anuloi një turne botëror në sportin e kriket në vitin 1968. Olivera kishte lindur në Afrikën e Jugut, por mbronte ngjyrat e Anglisë, ku kishte emigruar në vitin 1960. Për këtë gjë dhe për faktin se ai ishte sportist me ngjyrë, qeveria e asaj kohe në Afrikë anulonte turneun.

2) Çikago “Black Sox”
Sporti: Basketboll; viti 1919
Tetë pjesëtarë të skuadrës së “Chicago White Sox” në basketboll u akuzuan se kishin shitur për përfitime personale kampionatin e atij viti. Por ajo që tronditi më shumë ishte fakti se në këtë mesele ishte përfshirë edhe ylli i skuadrës, Xhoe Xhekson, një prej tre basketbollistëve më të mirë të të gjitha kohërave.

3) Ben Johnson
Sporti: Atletikë; viti 1988
Kanadezi fitonte medaljen e bronztë në lojërat olimpike në 100 metra dhe vetëm katër vjet më vonë në Seul arrinte të fiksonte rekordin e ri. Por kjo furi nuk zgjati shumë, pasi në analizat e anti-dopingut atij iu gjet një sasi e konsiderueshme asteroidesh, çka çoi në heqjen si të rekordit dhe të medaljes për atë garë.

4) “Tour de France”
Sporti: Çiklizëm; viti 2007
Tre çiklistë dhe dy skuadra të plota u tërhoqën pas testeve të drogës. Këtu përfshihet Majkëll Rasmusen, i cili kishte veshur një fanellë të verdhë gjatë asaj kohe, dhe Aleksandre Vinokourov, favoriti i garës. Mund të mos jetë skandali i fundit i drogës që prek garën çiklistike, por dështimi tregoi se skuadrat finaliste kanë humbur tolerancën ndaj mashtrimeve.

5) Tonja Harding
Sporti: Patinazh; viti 1994
Pranoi se kishte mbuluar njohurinë e saj për një sulm ndaj Nansi Kerrigan, rivalja e saj për skuadrën amerikane të patinazhit, që ishte sajuar nga ish-bashkëshorti i Harding. Kerrigan fitoi medaljen e argjendtë të lojërave Olimpike një muaj më vonë. Hardin u dënua me shërbim ndaj komunitetit dhe iu caktua një gjobë e madhe.

6) Zimbabve
Sporti: Kriket; viti 2003
Në vitin 2003 në Kupën Botërore të briketit në Afrikë, dy lojtarë nga Zimbabve, Andi Flouer dhe Henri Olonga, veshën shirita të zinj në krah gjatë ndeshjeve të tyre për të protestuar “vdekjen e demokracisë”. Asnjëri nuk luajti më. Anglia bojkotoi ndeshjen e programuar për protestë. Pikët që ata humbën iu dhanë Zimbabve e cila kaloi në raundin e dytë në vend të Anglisë. Që nga ajo ditë, statusi “Test” i Zimbabves është hequr.

7) Skandali “Moxhi”
Sporti: Futboll; viti 2006
Juventus, Milan, Fiorentina, Rexhina, Lacio ishin skuadrat që u ndëshkuan nga gjykata italiane pas hetimeve në skandalin më të madh në Serie A. Luçiano Moxhi, ish-administrator i Juventus, kishte ndikuar për sezone me radhë në disa ndeshje të kampionatit italian. Bilanci: Juventus zbret në Serie B, ndërsa ekipet e tjera dënohen me pikë për sezonin e ri.

8) Douglas Jardine
Sporti: Kriket; viti 1932
Mashtrim nga kapiteni anglez i kriketit apo protestë nga Australia? Taktika e Douglas Jardine për të neutralizuar influencën e Don Bradman, për të cilin ai mendonte se ishte “i verdhë”, duke bërë që skuadra të rrokulliste me shpejtësi mbi trupin e sipër të lojtarit, funksionoi. Mesatarja mbinjerëzore e Bradman ra në “vetëm” 57 dhe Anglia fitoi me sete. Kjo nxiti një makth diplomatik.

9) Park Si-Hun
Sporti: Boks; viti 1988
Shumë tifozë mbetën të surprizuar kur juria i dha fitoren boksierit korean, Park Si-Hun, kundrejt Roy Jones Jr në finalen e peshave të mesme më 1988. Por pas një hetimi të ndeshjes, në televizion u pa qartë se Jones kishte grushtuar për 86 herë kundërshtarin, ndërsa koreani vetëm 32 herë. Më vonë doli se tre gjyqtarët kishin qenë një natë më parë mysafirët specialë të koreanit.

10) Hansi Kronje
Sporti: Kriket; viti 2000
Kapiteni i kriketit të Afrikës së Jugut u dënua nga loja për jetë pasi rrëfeu pjesën e tij në skandalin më të madh të fiksimit të ndeshjeve në historinë e lojës, duke qarkulluar me qindra mijëra dollarë, si dhe një xhaketë lëkure për kompletimin e një rezultati në “2000 Centurion Test” me Anglinë.

11) Glen Hodwll
Sporti: Futboll; viti 1999
Trajneri i përfaqësueses angleze të futbollit u mundua të mbrohej teksa në faqet e revistës “Times” u publikua një intervistë e tij, ku ai fliste plot përçmim për personat dizabël. Por ja që gazetari që kishte marrë intervistën kishte ruajtur në diktofon gjithçka dhe kështu që e bëri publike. Pas kësaj Hodwll dha dorëheqjen.

12) Hile paralitikësh
Sporti: Basketboll; viti 2000
Spanja arriti të fitonte medaljen e artë në basketboll për njerëz paralitikë në vitin 2000. Por ajo që bëri më shumë përshtypje në hetimet e mëvonshme, ishte fakti se dhjetë nga dymbëdhjetë basketbollistët e skuadrës spanjolle nuk kishin qenë paralitikë, por persona normalë.

13) “Rebelët” e Afrikës së Jugut
Sporti: Kriket; vitet 1970-91
Për shkak të Aparteidit në Afrikën e Jugut nuk ishte e lejuar në vitet ‘50-‘90 që të zhvilloheshin turne të Kriketit. Por një gjë e tillë nuk mundi të ndalë sportistë si Graham Gosh në 1982-shin, Kim Hjuxh (1985) dhe Mike Gating më 1987 e 1990, të cilët arritën të merrnin pjesë në disa turne, ndonëse jo zyrtarisht, në vende si Anglia dhe Australia, nën siglën e Afrikës së Jugut.

14) Heidi Krieger
Sporti: Atletikë; viti 1986
Ajo ishte një nga atletet më të mira të Gjermanisë Perëndimore, por që dozohej sistematikisht me asteroide. 11 vjet pasi kishte fituar medaljen e artë në kampionatin evropian, ajo ndërhyri në trupin e saj duke ndërruar seksin. Arsye, sipas dëshmive që ajo dha më vonë, ishte pikërisht dopingu që ajo merrte nga trajnerët e saj të cilët kishin ndikuar në trans-seksualitetin e saj.

Comments

Njëzet gjëra që fëmijët tuaj duhet të bëjnë

2007-08-29T07:36:05+02:00

A i provuar fëmijët tuaj 20 gjërat që çdo fëmijë duhet t’i bëjë pa mbushur 10 vjeç? A kanë ecur me biçikletë në një pellg me baltë, organizuar një piknik me kukulla apo pjekur bukë? Mësojini fëmijët të ndërtojnë një fole për dallëndyshet, mësojini të ushqejnë kafshët në fermë, ndërtoni bashkë me to kështjella në rërë, lërini të vizatojnë fytyrën me ngjyrat e tyre të dashura. Lista e gjërave që duhet të bëjnë të gjithë fëmijët pa mbushur 10 vjeç është hartuar nga kompania “Persil” e detergjenteve larës për të inkurajuar fëmijët që të luajnë pa u shqetësuar se mund të bëhen pis.
Lista
Po të vërehet me kujdes, në listë bëjnë pjesë të gjitha aktivitetet që fëmijët e gjithë brezave i kanë kaluar. Në ditët e sotme, për arsye nga më të ndryshmet, fëmijët janë gjithnjë e më pak fëmijë. Uluni me fëmijët tuaj dhe merreni me radhë listën, sa prej atyre gjërave i kanë bërë fëmijët tuaj? Nëse ka akoma shumë gjëra pa provuar, mos hezitoni, merrni biçikletën dhe shkoni në parqe të gjelbëruara, bëni një shëtitje alpine në mal, uluni së bashku në kuzhinë dhe filloni e gatuani, pse jo, bëni një balonë e fluturojeni.
Fëmijët të jenë fëmijë
Në krahasim me brezat e mëparshëm, fëmijët sot janë të rrethuar nga probleme shëndetësore. Prindërit i mbrojnë më shumë se kurrë fëmijët, duke i shmangur nga çdo lloj ekspozimi natyror. Deri këtu, s’ka asgjë të gabuar, por lejojini fëmijët të jenë fëmijë. Lejojini të vrapojnë, mos ushtroni presion mbi ta, mos i detyroni të rrinë gjithë kohën mbi divan.
Fëmijët dhe presioni
Në shumë vende të ndryshme qeveritë i inkurajojnë personat që kujdesen për fëmijët që të veçojnë 4-vjeçarët më inteligjentë në mënyrë që ata të marrin kujdes ekstra. Por a është një gjë e mirë kjo për fëmijët, apo është një ngarkesë e madhe në një moshë shumë të hershme. Shumë të rritur, të cilët rikujtojnë fëmijërinë e tyre të hershme besojnë se liria për të luajtur dhe mungesa e presionit ka qenë gjëja më e mrekullueshme në atë kohë.

Lista
1. Të rrotullohen në bregun e pjerrët me bar të një lumi.

2. Të fusin duart në llaç.

3. Të lexojnë nën mbulesën e krevatit me një elektrik.

4. Të bëjnë parfum me petale lulesh.

5. Të mbjellin fasule në një kavanoz me pambuk.

6. Të bëjnë maska prej letre.

7. Të ndërtojnë kështjella rëre.

9. Të ngjiten në pemë.

10. Të bëjnë një pikturë me duar e këmbë.

11. Të pikturojnë fytyrën.

12. Të gatuajnë bukë.

13. Të krijojnë një skulpturë prej plasteline.

14. Të pjekin kek.

15. Të ushqejnë një kafshë.

16. Të mbledhin luleshtrydhe.

17. Të njohin pesë lloje të ndryshme zogjsh.

18. Të mbledhin krimba.

19. Të fluturojnë një balonë.

20. Të ndërtojnë një fole me bar dhe kashtë.

Comments

Kush janë gratë e pasura të miliarderëve të botës

2007-08-29T07:34:37+02:00

Pas çdo burri të madh, qëndron një grua e fortë thuhet. Ndërsa pas çdo burri të pasur, qëndron një grua që pret të bëhet akoma më e pasur. U takon miliarderëve, në fakt, që të zgjedhin gruan e tyre të ardhshme dhe zakonisht ato zgjedhin të martohen me disa prej grave më të bukura në botë, e zakonisht, shumë më të reja në moshë.
Sidoqoftë ka dhe përjashtime. Ka raste kur miliarderët zgjedhin si bashkëshorte një person që ndan të njëjtat mendime dhe ambicie me ata. Ka dhe nga ata miliarderë që preferojnë të martohen me femra të të njëjtit nivel ekonomik me ta. Por, pothuajse në të gjitha rastet e mundshme, ekzistojnë shumë femra në radhë, ato që quhen “gjuajtëse pasurish”, që presin që miliarderi të divorcohet nga bashkëshortja aktuale.
Martesat
Martesa e Donald Trump me gruan e tij të re dhe modele, Melania Trump, është konsideruar si shembulli tipik i martesës mes miliarderit që do të ketë në krah një femër të bukur dhe femrës së bukur që dëshiron të jetojë me të gjitha komoditetet që ia siguron një bashkëshort miliarder. Ndryshe janë njohur Bill Gates dhe bashkëshortja e tij, Melinda. Ajo punonte si menaxhere në “Microsoft” për nëntë vite, gjatë të cilave u njoh, u lidh dhe u martua me themeluesin e kompanisë. Gail Golden punonte si asistente e Carl Ichan për vite me radhë deri sa e bënë zyrtare lidhjen e tyre në vitin 1999, kur Icahn u divorcua me bashkëshorten. Miliarderë të tjerë përfundojnë të martuar me gratë që i kanë njohur para se të kishin shumë para. Një prej tyre është Sergey Brin, bashkë-themeluesi i “Google”, i cili u martua me të dashurën e tij të universitetit.
Ndryshe
Nuk janë të pakta rastet kur njerëzit, pasuria e të cilëve i kap dhjetë shifrat, preferojnë partnerë me të njëjtin status social dhe financiar. Miliarderi irlandez Tony O’Reilly është martuar me një trashëgimtare greke. Miliarderja spanjolle Esther Koplowitz është martuar me Fernando Falco, Markez i Kubës, pinjoll i një familjeje të vjetër spanjolle.

Wendi Deng, 39 vjeç
Martuar me Rupert Murdoch, 76 vjeç, me një pasuri prej 9 miliardë dollarës sipas revistës “Forbes”.

Melinda Gates, 42 vjeç
Martuar me Bill Gates, 51 vjeç, i renditur nga revista “Forbes” si më i pasuri në botë për vitin 2007, me pasuri prej 56 miliardë dollarësh.

Gail Golden, 58 vjeç
Martuar me Carl Icahn, 71 vjeç, i renditur nga revista “Forbes” në vend të 42-të, me pasuri 13 miliardë dollarë.

Anne Dias Griffin, 36 vjeç
Kenneth Griffin, 38 vjeç, sipas revistës “Forbes” me një pasuri prej 1.7 miliardë dollarësh.

Veronica Lario, 51 vjeç
Martaur me Silvio Berlusconi, 70 vjeç, i renditur nga revista “Forbes” në vend të 51-të, me pasuri 11.8 miliardë dollarë.

Miriam Ochshorn, 60 vjeç
Martuar me Sheldon Adelson, i renditur nga revista “Forbes” në vend të 6-të, me pasuri 26.5 miliardë dollarë.

Erica Baxter Packer, 29 vjeç
Martuar me James Packer, 39 vjeç, sipas revistës “Forbes” me një pasuri prej 5.5 miliardë dollarësh.

Melania Trump, 37 vjeç
Martuar me Donald Trump, 61 vjeç, sipas revistës “Forbes” me një pasuri prej 2.9 miliardë dollarësh.

Anne Wojcicki, 33 vjeç
Martuar me Sergey Brin, 33 vjeç, i renditur nga revista “Forbes” në vend të 26-të, me pasuri 16.6 miliardë dollarë.

Salma Hayek, 41 vjeç
Fejuar me François-Henri Pinault, 45 vjeç, administrator i pasurisë 14.5 miliardë dollarësh të të atit.

Comments